O‘zbekistonlik professional bokschi Fazliddin G‘oyibnazarov joriy yilning 9 dekabr kuni AQSHning Nyu-York shahridagi muhtasham Madison Square Garden arenasida meksikalik Aleksis Del Boskega qarshi jang o‘tkazishni rejalashtirayotgandi.

Lekin noma’lum sabablarga ko‘ra Fazliddinning raqibi rossiyalik Andrey Klimovga o‘zgartirildi. 35 yoshli bokschi profi ringda 23 ta jang o‘tkazgan bo‘lib, ularning 19 tasida g‘alaba qozongan. To‘rtta jangda mag‘lubiyatga uchragan. To‘qqizta jangda raqiblarini nokautga uchratgan.

E’tiborlisi shundaki, Klimov mag‘lubiyatlaridan 3 tasini ketma-ket oxirgi janglarida qabul qilib olgan. Ya’ni, Andrey so‘nggi 3 ta jangning barchasida imkoniyatni boy bergan.

Eslatib o‘tamiz, mashhur promouter Bob Arumga tegishli Top Rank promouterlik kompaniyasi mijozi bo‘lgan Fazliddin G‘oyibnazarov 22 sentyabr kuni AQSHning Arizona shtati Tuson shahrida meksikalik Viktor Rosasni 80:72, 80:72, 80:72 hisobida mag‘lub etgandi.

Ma’lumot uchun, 9 dekabr kungi boks oqshomining markaziy jangi Vasiliy Lomachenko ishtirokida o‘tkaziladi. Ukrainalik 29 yoshli bokschi kubalik 36 yoshli Gilyermo Rigondoga qarshi ringga ko‘tariladi. Jang birinchi yengil vazn (59 kg) toifasida o‘tkazilib, o‘rtaga Lomachenkoga tegishli WBO chempionlik kamari qo‘yiladi.