Bugun poytaxtimizdagi “O‘zbekiston” sport majmuasida dzyudo bo‘yicha Gran-Pri musobaqasi boshlandi.

Sovrin jamg‘armasi 100 000 AQSH dollarini tashkil etuvchi nufuzli musobaqada dunyoning 27 ta davlatidan jami 183 nafar sportchi tatamiga chiqadi. Eng ko‘p ishtirokchi terma jamoamiz tarkibida qayd etilgan bo‘lib, 55 nafar dzyudochi bugundan medallar uchun bahslarga kirishadi.

Musobaqa reglamentiga ko‘ra mezbon davlat har bir vazn toifasida to‘rt nafar sportchi bilan qatnashishi mumkin. Aynan shu imkoniyat va vakolatdan O‘zbekiston dyuzdo federasiyasi foydalandi. Bugun erkaklar o‘rtasida -60 va -66 kg vazn toifalarida bahslar bo‘lib o‘tadi. Kunning ikkinchi yarmida esa aynan mana shu vaznlarda g‘olib hamda sovrindorlar nomi ma’lum bo‘ladi.

Ma’lumot uchun, Toshkent Gran-Prisi 2013 yildan beri an’anaviy tarzda o‘tkazib kelinmoqda. Terma jamoamiz a’zolari shu paytga qadar musobaqada ikki marta umujamoa hisobida birinchi o‘rinni egallashgan. 2013 yilgi musobaqada 5 oltin, 3 kumush va 5 bronza medallari bilan birinchi bo‘lgan hamyurtlarimiz, o‘tgan yili 6 ta oltin, 3 ta kumush va 11 ta bronza medallari bilan umumjamoa hisobida g‘oliblikni qo‘lga kiritishgandi. Eslatib o‘tamiz, Gran-Pri turniri 8 oktyabrga qadar davom etadi.