Futzal bo‘yicha O‘zbekiston milliy terma jamoasi 2018 yilgi Osiyo chempionatining saralash bahslarida ishtirok etish uchun Eronga boradi.
Bahodir Ahmedov boshchiligidagi terma jamoamiz saralashda Markaziy va Janubiy Osiyo mintaqasining “A” guruhidan joy olgan. Guruhda vakillarimizga Qirg‘iziston, Turkmaniston va Nepal raqiblik qiladi. Guruhda birinchi va ikkinchi o‘rinni olgan jamoalar qit’a birinchiligiga yo‘llanmani qo‘lga kiritishadi.
Markaziy va Janubiy Osiyo mintaqasidagi saralash bellashuvlari Eronning Tabriz shahrida bo‘lib o‘tadi. "A" va "B" guruhi jamoalari Osiyo chempionatiga kimlar borishini aynan Tabrizda bilib olishadi. Forslar yurti mezbonlik qiladigan saralash o‘yinlari 15-17 oktyabr kunlari bo‘lib o‘tadi.
Ayni paytda O‘zbekiston terma jamoasi Bahodir Ahmedov bosh murabbiyligida Toshkentda yig‘in o‘tkazmoqda va bo‘lajak bellashuvlarga tayyorgarlik ko‘rmoqda.
Eslatib o‘tamiz, O‘zbekiston terma jamoasi Eronga 13 oktyabr kuni Istanbul orqali uchib ketadi.
