O‘zbekiston Futbol Federasiyasi va Professional Futbol Ligalarining tarkibiy tuzilmalarida futzal, plyaj futboli va ayollar futboli bilan shug‘ullanadigan yangi lavozimlar tashkil qilindi. Bundan tashqari, futbol bo‘yicha sport mahoratini oshirish Respublika oliy maktabi qoshida ham shu soha bilan shug‘ullanadigan murabbiylar guruhi ish boshladi. Shu munosabat bilanO‘zbekiston Futzal Uyushmasi hamda O‘zbekiston ayollar futboli va plyaj futboli uyushmasi tugatiladigan bo‘ldi.
Futzal, ayollar futboli va plyaj futbolining taraqqiyoti, murabbiylar tayyorlash va ularning malakasini oshirish, terma jamoalarni musobaqalarga tayyorlash va yuborish, shuningdek, milliy chempionat o‘yinlarini tashkil qilish va o‘tkazishni shu yilning oktyabr oyidan e’tiboran O‘zbekiston Futbol Federasiyasi o‘z nazorati ostiga oladi.
O‘zbekiston Professional Futbol Ligasining Sport bo‘limida ham futzal, ayollar futboli va plyaj futboli bo‘yicha musobaqalar o‘tkazishga mas’ul bo‘linma ham ish boshlaydi. Ushbu bo‘linma O‘zbekiston Futbol Federasiyasining shu sohani nazorat qiladigan boshqarmasi bilan kelishgan holda ish olib boradi.
