“Paxtakor” – “Qo‘qon-1912” (2:0) uchrashuvidan keyingi matbuot anjumanida  jamoamiz ustozi No‘’mon Hasanov o‘z fikrlarini bildirdi.   – Uchrashuv avvalida futbolchilardan hujumkor o‘yinni talab qilgandim. Shogirdlarim o‘yin boshida hujumkor o‘ynashdi va imkoniyatlarga ega bo‘ldi. Ammo vaziyatlarni golga aylantira olmadik. Ikkinchi bo‘limda esa “Paxtakor” kuchli o‘ynadi va haqli g‘alabaga erishdi. Bu g‘alaba bilan ularni tabriklayman.   Futbolchilarimizda biroz hayajon ham bor edi. Javohir Sidiqov bugun jarohatidan keyin o‘ynadi, bu ham o‘z ta’sirini ko‘rsatdi. Akmal Xolmurodovni yo‘qligi ham sezildi. Dastalbki 30 daqiqada jamoamiz yaxshi o‘ynadi. Ammo keyinchalik mezbonlar tashabbusni o‘z qo‘llariga olishdi. Bunda jamoadagi mahoratli futbolchilarni xizmati katta bo‘ldi.   Jamoamiz birinchi davrani yaxshi o‘tkazgandi. Ammo tanaffusdan keyin jamoamiz charchab qoldi. Bitta tarkibni butun mavsumda o‘ynatish juda qiyin. “Qo‘qon-1912″da zaxira tor, bu esa o‘z ta’sirini ko‘rsatmoqda.   Jamoaga kelganimdan keyin ko‘p narsani o‘zgartirdim. Kelajakda qo‘qonlik muxlislarni ham bir xil rangli liboslarda o‘tirishlarini istayman va buni amalga oshirmoqchiman. Chunki Koreyaga borganimda u yerdagi muhit va ularni bir xil bo‘lib o‘tirishlarini ko‘rib buni dilimga tugib qo‘ygandim. Kelajakda jamoani yanada yaxshi taraflama o‘zgartirmoqchiman.   Pul bor, ammo hozir mavsum oxiriga qadar yetadigan mablag‘ mavjud. Keyingi mavsumda ham homiylar qo‘llab-quvvatlashsa yanada kuchayib, yaxshi natijalarga erishamiz.   Davralar oralig‘ida tarkibni keskin kuchaytirish imkoni bo‘lmadi. Faqatgina ikki futbolchini o‘z safimizga qo‘shib oldik. Kelasi mavsumda jamoani zaxira o‘rindig‘ini ham yanada kengaytirib, tarkibni kuchaytirmoqchiman. Jamoani qiyin ahvolda qabul qilib olgandim.   Shartnomam yil yakuniga qadar mo‘ljallangan. Shartnomam ko‘p yillik bo‘lganda ham murabbiy yaxshi natija qayd etmasa, unga chiqish eshiklarini ko‘rsatishadi. Niyatim va maqsadim Qo‘qonni futbolini ko‘tarish. Chunki o‘zim shu shahar farzandiman.