«Dinamo» - «Olmaliq» (1:0) uchrashuvida jarima zarbasidan muhim golni urib o‘yin qahramoniga aylangan Iskandar Xolmirzayevdan bahs borasidagi fikrlarini so‘radik.
«Anchadan buyon g‘alaba qozona olmayotganimiz sababli «Olmaliq» bilan bahsda faqat va faqat g‘alabani ko‘zlagan edik. Raqib jamoa tarkibi bo‘ydor futbolchilardan tashkil topganligi bois, murabbiylarimiz paslar orqali hujumkor to‘p surishimizga ko‘rsatma berishgandi. Xudoga shukurki, bu safar omadimiz kelib, yakunda nihoyat g‘alaba qozondik.
Kiritgan golim haqida gapiradigan bo‘lsam, murabbiylar o‘yindan oldin jarima zarbalarini men tepishimni aytishgandi. Zarba berishdan oldin raqib darvozabonining uzoq burchagi ochiqligini payqab, to‘pni o‘sha tomon yo‘naltirdim va gol urdim.
Kubok doirasida nimchorak finalda ham aynan mana shunday golni safarda «Olmaliq» darvozasiga kiritgandim. Qaysi biri chiroyli? Buni muxlislar aytgani ma’qul. Men uchun gol urganim emas, eng asosiysi «Dinamo» g‘alaba qozonganidir.
Muxlislarimizdan minnatdormiz. Nasib qilsa, keyingi o‘yinlarda ham ularni xursand qilish uchun intilamiz» - deydi «Dinamo» jamoasining 26 yoshli yarimhimoyachisi Iskandar Xolmirzayev klub rasmiy saytiga bergan intervyusida.
