«Milan» bosh murabbiyi Vinchenso Montella Italiya A seriyasining 8-turi doirasida bo‘lib o‘tgan «Inter»ga qarshi o‘yin (3:2) borasida o‘z fikrlarini bildirib o‘tdi.

«Biz ikkinchi bo‘limni ajoyib tarzda o‘tkazdik. Biz haqiqiy «Milan» ruhiyatida o‘ynadik. Bugungi o‘yinimiz menga yoqdi. Afsuski, ochko qo‘lga kirita olmadik, lekin o‘yin sifati bo‘yicha jamoa to‘g‘ri yo‘ldan ketyapti.

Bugungi o‘yindan keyin biz optimistik ruhda bo‘lishimiz kerak. Stakanning yarmi to‘la ekanini ko‘ryapman va ishlashda davom etishni istayman.

Raqibimiz yaratilgan vaziyatlardan foydalanishda bizga nisbatan yaxshiroq harakat qildi. Men esa futbolchilardan keyinchalik ham shunday xarakter ko‘rsatishini so‘rayman. Shunday o‘ynashda davom etsak, boshqa yutqazmasak kerak.

G‘urur va qat’iylik ko‘rsatganimiz bois, uchrashuvning borishini o‘zgartira oldik. Ko‘p sonli yangi o‘yinchilar bilan qisqa vaqt ichida birdaniga yangi loyiha tuzish qiyin. Ammo chempionat yakunida kuchli to‘rtlikka kirish mumkin, deb hisoblayman», — dedi Montella.

«Milan» Italiya chempionatining ushbu mavsumida 12 ochko bilan 9-o‘rinni egallab turibdi. Montella shogirdlari jadvalda 4-o‘rinni egallab turgan «Lasio»dan 7 ochko ortda qolmoqda.