Bugun, 15 oktyabr kuni Indoneziya chempionatida mudhish voqea sodir bo‘ldi.
Mahalliy “Persela Lamongan” hamda “Semen Padang” klublari o‘rtasidagi uchrashuv (2:0) vaqtida mezbonlar darvozaboni Xoyrol Xuda ikki futbolchi bilan qattiq to‘qnashuv oqibatida hushini yo‘qotdi.
Shifokorlar hushini yo‘qotgan darvozabonni zambil yordamida maydondan olib chiqib ketishdi va unga birinchi yordamni ko‘rsatishgandi.
Biroq shifoxonaga olib ketilayotgan vaqtda Xudaning joni uzildi. Tashxislarga ko‘ra, 38 yoshli darvozabon bosh va bo‘yin qismidan qattiq lat yeyishi natijasida vafot etgan.
Ma’lumot uchun, Xoyrol Xuda “Persela Lamongan” klubida 1999 yildan beri faoliyat olib kelardi va uni klub muxlislari tirik afsonaga qiyoslashardi.
Eslatib o‘tamiz, joriy yilning 1 oktyabr kuni Gruziyaning “Zugdidi” jamoasi darvozaboni, 31 yoshli Shota Maminashvili o‘yindan oldin o‘tkaziladigan mashg‘ulotlarda hushini yo‘qotib, maydonning o‘zida jon bergandi.
Akmalxon Eshonxonov
