Xitoyning Nankin shahrida 19 yoshgacha bo‘lgan ayollar o‘rtasida futbol bo‘yicha Osiyo chempionati davom etmoqda. Ushbu musobaqada ishtirokini davom ettirayotgan O‘zbekiston terma jamoasi guruhdagi ikkinchi o‘yinga qizg‘in tayyorgarlik ko‘rmoqda.
Bugun kunning birinchi yarmida terma jamoa bosh murabbiyi Bahrom Norsafarov futbolchi qizlar bilan nazariy mashg‘ulot o‘tkazdi. Unda ertangi raqib – Shimoliy Koreya terma jamoasining Tailandga qarshi kechgan o‘yini tahlil qilindi. Raqibning kuchli va kuchsiz tomonlari terma jamoa a’zolariga tushuntirildi.
Kunning ikkinchi yarmida futbolchilar amaliy mashg‘ulot o‘tkazishdi. Mashg‘ulot davomida asosiy e’tibor tezkor ravishda himoyadan hujumga o‘tishga qaratildi. Shuningdek, jarima maydonchasi tashqarisidan darvozaga aniq zarbalar yo‘llash va standart vaziyatlardan unumli foydalanish borasida ham murabbiylar belgilab bergan mashqlar bajarildi.
Ertangi o‘yinda O‘zbekiston U-19 terma jamoasi asosiy tarkibida bir qator o‘zgarishlar bo‘lishi kutilmoqda. Murabbiylar shtabi raqibga qarshi yashirin qurollardan foydalanishga va shu yo‘l orqali ijobiy natija qayd etishga qaror qilishgan.
