Xabaringiz bor, 2015 yilda Toshkentning “Lokomotiv” hamda Angliyaning “Flitvud Taun” klublari o‘rtasida o‘zaro hamkorlik memorandumi imzolangan edi. Shunga asosan ingliz klubi bilan bir qator yo‘nalishlarda yaqindan xamkorlik qilish bo‘yicha kelishuvga erishilgandi.

Natijada dastavval “Lokomotiv” tarbiyalanuvchilari bo‘lmish Sergey Proxorov va Rustam Nortojiyev “Flitvud Taun” klubida 3 oy malaka oshib qaytishgan edi. Yaqinda “Lokomotiv”ning navbatdagi yosh futbolchilari ingliz klubida tajriba to‘plash uchun yo‘l olishdi. Yosh iste’dod egasi Xurmatbek Yo‘ldoshev hamda “Flitvud Taun” jamoasi murabbiylar shtabining iltimosiga ko‘ra iqtidorli darvozabon Rustam Nartadjiyev yana bir bor ingliz klubi mashg‘ulotlarida ishtirok etib, mazkur jamoa safida uchrashuvlarda maydonga tushish imkoniga ega bo‘lishadi.

Qayd etish joizki, ushbu ikki yosh futbolchilar bilan birgalikda Angliyaga yo‘l olgan “Lokomotiv” PFK rasmiy delegasiyasi “Flitvud Taun” jamoasi vakillari bilan bir qator masalalar bo‘yicha fikr almashdi hamda o‘zaro hamkorlikni yanada rivojlantirish borasida muzokaralar olib bordi.

Qolaversa, “Lokomotiv” delegasiyasi vakillari “Flitvud”da muxlislar bilan ishlash, marketing, o‘yinni reklama qilish kabi sohalar bilan yaqindan tanishish imkoniga ega bo‘lishdi.

Shuningdek, o‘zaro hamkorlik doirasida “Lokomotiv” futbol maktabining yosh tarbiyalanuvchilari kelasi yili yozda Angliyada tashkil etiladigan xalqaro musobaqa ishtirok etishlari kelishib olindi. Ushbu musobaqada Peru, Meksika, Boliviya, Gollandiya, Irlandiya, Angliya, Shvesiya, Fransiya, Irlandiya hamda O‘zbekiston klublari ishtirok etishi ko‘zda tutilgan.