Gruziyaning “Chixura” klubi futbolchilari joylashgan mikroavtobus Xashuri shahridan uzoq bo‘lmagan hudud atrofida yo‘l-transport hodisasiga uchradi.

Ma’lum bo‘lishicha, “Chixura” a’zolari 22 oktyabr kuni Tbilisiga qaytib kelishgan bo‘lib, ular mahalliy chempionatning 21-tur doirasida Batumining “Dinamo” klubiga qarshi maydonga tushishgan va  2:1 hisobida g‘alaba qozonib, xursandchilik kayfiyatida ortga, ya’ni o‘z shaharlari Sachxerega qaytishayotgan bo‘lishgan.

Jamoa rahbariyatining aytishicha, YTH oqibatida avtobus ichida bo‘lgan futbolchilardan hech qaysi biriga sezilarli darajada shikast yetmagan.  Faqat klub sardori Shota Kashiya yelka qismidan jiddiy jarohat olgan.

E’tiborli tomoni, Shota Kashiya kecha o‘zining 33 yoshini nishonlagandi. U futbol bo‘yicha Gruziya terma jamoasining sobiq sardori Guram Kashiyaning ukasi hisoblanadi.

Ma’lumot uchun, “Chixura” jamoasi Gruziya mahalliy chempionatida 21 turdan so‘ng 46 ochko jamg‘arib, oltinchi o‘rinni egallab turibdi.

Eslatib o‘tamiz, joriy yilning 1 oktyabr kuni Gruziyaning “Zugdidi” jamoasi darvozaboni Shota Maminashvili o‘yindan oldin o‘tkazilgan mashg‘ulotlarda hushini yo‘qotib, noma’lum sabablarga ko‘ra vafot etgani haqida xabar bergandik.