Oliy liganing 26-tur doirasida kechgan “Sho‘rtan” – “Sug‘diyona” uchrashuvidan so‘ng matbuot anjumani bo‘lib o‘tdi. Ushbu matbuot anjumaning birinchi qismida ishtirok etgan "So‘g‘diyona" bosh murabbiyi – Igor Anatolyevich Shkvirin o‘yin borasidagi fikrlarini  quyidagicha talqin qildi.

— To‘g‘risini aytsam, birinchi bo‘limni shogirdlarim “qo‘ldan o‘tar” tarzda o‘tkazishganining sababni o‘zim ham tushuna olmadim. Shuning uchun bu borada qandaydir fikr bildirishga qiynalib turibman. Ikkinchi bo‘limni esa ancha yaxshi o‘tkazdik. O‘ylaymanki, agar biz ikkinchi bo‘limning birinchi yarmida yaratgan vaziyatlarimizdan va imkoniyatlarimizdan samarali foydalanganimizda, natijada o‘zgacha bo‘lishi mumkin edi. Shunday bo‘lsada, “Sho‘rtan” jamoasining ustunligini ham rad eta olmayman. Qanchadan-qancha vaziyatlarda bizlarni darvoza ustuni va to‘sinlari hamda darvozabonimizning mahorati asrab qolgani ham bunga yaqqol dalolat bo‘la oladi. Bularning barchasini bir yerga jamlasak, “Sho‘rtan” bu g‘alabaga loyiq ekanini isbotlay oldi deb bemalol aytish mumkin.

— Jamoangiz futbolchilarida ham imkoniyatlar talaygina bo‘ldi. Ularni yakuniga yetkazib quyish uchun shogirdlaringizga nima yetishmadi yoki xalaqit qildi deb hisoblaysiz.
— Birinchi o‘rinda mohirlik yetishmadi deb o‘ylayman. Sababi, uchta yaqqol golli vaziyatda futbolchilar to‘pni darvoza ustidan oshirib tepishlarini boshqacha izohlab bo‘lmaydi. Bundan tashqari, o‘tkazishga harakat qilgan bosimimizni ham tegishli darajada yakunlay olmadik. O‘z o‘rnida shuni aytib lozimki, jamoamizda ba’zi o‘ziga, o‘z imkoniyatlariga va kuchlariga juda ishonuvchan futbolchilarimiz mavjud. Ularning o‘zlariga bo‘lshan bu ishonchlari mahoratlaridan ancha ustun kelmoqda. Fursatdan foydalanib, ular kabilarga o‘ziga bo‘lgan o‘ta ishonchni biroz pasaytirishni yoki bo‘lmasa mahoratlari ustida ko‘proq ishlab, muvozanatni ushlashni o‘rganishni maslahat bermoqchiman. Aks holda, ulardagi bu disbalans butun jamoa o‘yiniga o‘z ta’sirini o‘tkazishini anglab yetishlarini istardim.

— Bugun maydonda yetakchi futbolchilaringiz Toshpo‘latov va Rashidovlar maydonga tusha olmadilar. Nima deb o‘ylaysiz, ular bugun o‘yin suratini o‘zgartira olgan bo‘larmidi?
— Toshpo‘latovni jamoaning yetakchi futbolchisi deb hisoblamayman. U o‘tgan uchrashuvda “yo‘q joydan” keraksiz bo‘lgan qizil kartochka olib, bugungi o‘yinni o‘tkazib yubordi. Asablarni biroz jilovlay bilish kerak. Rashidovga to‘xtaladigan bo‘lsak, u sariq kartochkalari soni 4taga yetgani bois jamoamizzga yordam berolmadi. Uning o‘rni bugun haqiqatdan ham sezilib turdi.