“CIES Football Observatory” tadqiqot markazi Yevropaning 5 ta top-ligasida ishtirok etadigan klublar narxlari haqida ma’lumot berdi.

Ya’ni jamoalar tarkibidagi futbolchilarning taxminiy transfer narxidan foydalanib, jahondagi eng qimmat 10 ta klub ro‘yxatini tuzib chiqdi.

Unga ko‘ra, Angliyaning “Manchester Siti” dunyodagi eng qimmat tarkibga ega jamoalar ro‘yxatida eng oldingi o‘ringa joylashtirildi!

“Manchester Siti”, “Tottenxem”, “Barselona” va “Chelsi” klublarining hozirgi tarkibining umumiy qiymatining 1 milliard yevrodan yuqori ko‘rsatkichni zabt etdi.

“Manchester Siti” jamoasi tarkibidagi umumiy futbolchilarning narxi 1 milliard 196 million yevrodan tashkil topdi. Klubning eng qimmat futbolchisi sifatida Kevin de Bryuyne (144,5 million yevro) qayd etildi.

Bundan tashqari, “Siti”ning yana uch futbolchisining narxi ham 100 million yevrodan ko‘proq. Ular Leroy Sane (118,4 million yevro), Rahim Sterling (118,2 million yevro) va Gabriel Jezus (105,4 million yevro) lar hisoblanishadi.

Ro‘yxatning ikkinchi o‘rnini Angliyaning yana bir vakili “Tottenxem” egallagan. Ushbu jamoa futbolchilarning umumiy narxi 1 milliard 173 million yevro bo‘lib, londonliklar orasida Xarri Keyn (186 million yevro) eng qimmat futbolchi hisoblanadi.

Kuchli uchlikni “Barselona” jamoasi yakunlab berdi. Kataloniyalik futbolchilarning umumiy qiymati bir milliard 130 million yevroni tashkil etmoqda.

Ularning eng qimmat futbolchisi sifatida Luis Suares ko‘rsatilgan bo‘lsa, (134 million yevro) Lionel Messining transfer qiymati 117,3 million yevroni tashkil etdi.

Yevropa Chempionlar Ligasining amaldagi sohibi, Madridning “Real” klubi futbolchilari kutilmaganda ro‘yxatning 6-o‘rnidan joy egallashdi.

“Qirollik klubi” futbolchilarning umumiy narxi 903 million yevro. Shuningdek, madridliklar tarkibida Krishtianu Ronaldu eng qimmat futbolchi sifatida ko‘rsatilgan. Portugaliyalik futbolchining transfer qiymati 96 million yevroni tashqil qilmoqda.

Hozirda dunyoning eng qimmat futbolchisi Neymar to‘p suradigan Fransiyaning “PSJ” klubiga ro‘yxatning 10-o‘rni nasib etdi.

Eslatib o‘tamiz, Neymar joriy yilgi transferlar mavsumida 222 million yevro evaziga Ispaniyaning “Barselona” klubidan “PSJ”ga o‘tib ketgani haqida xabar bergandik.

Eng qimmat 10 ta jamoaning ro‘yxati quyidagicha ko‘rinish olgan:

1. “Manchester Siti” — 1,196 mlrd yevro.

2. “Tottenxem” — 1,173 mlrd yevro.

3. “Barselona” — 1,130 mlrd yevro

4. “Chelsi” — 1,044 mlrd yevro.

5. “Manchester Yunayted” — 919 mln yevro.

6. “Real Madrid” — 903 mln yevro.

7. “Liverpul” — 901 mln yevro

8. “PSJ” — 864 mln yevro

9. “Atletiko Madrid” — 800 mln yevro.

10. “Yuventus” — 743 mln yevro.

Ma’lumot uchun, futbolchilarning transfer qiymati “CIES” tadqiqot guruhi tomonidan ishlab chiqilgan algoritm asosida baholanadi.