"Barselona" va Ispaniya terma jamoasi afsonasi Karles Puyol "Paxtakor" - "Olmaliq" uchrashuvini stadiondan kuzatdi.

Tushda "Paxtakor" stadionida 1979 yilda aviahalokatda hayotdan ko‘z yumgan jamoa a’zolari xotirasiga barpo etilgan yodgorlikka gul qo‘yib, marhumlar futbol faxriylari bilan xotirlagan sobiq himoyachi kechki payt oliy liga uchrashuvini kuzatish uchun tashrif buyurdi.

Mavsumdagi oxirgi uy uchrashuvidan avval o‘zbek estradasi yulduzi Shahzoda ishqibozlar kayfiyatini o‘z qo‘shiqlari bilan ko‘tardi. Shundan so‘ng maydonga Karles Puyol taklif etildi. U dastlab muxlislarga dastxati tushirilgan to‘plarni taqdim qildi. So‘ng O‘zbekistonga tashrifidan mamnun ekani, yurtimiz futbol borasida taraqqiyotga erishayotgani haqida to‘xtalib o‘tdi.

Jamoalar bilan salomlashgach, Puyolga uchrashuvni faxriy mehmon sifatida boshlab berishga imkon berildi. Shu tariqa u "Paxtakor" - "Olmaliq" uchrashuvida to‘pni birinchi bo‘lib tepdi va mezbonlarning 2:0 hisobidagi g‘alabasi bilan yakunlangan bellashuvni stadionda kuzatdi.