Argentina terma jamoasining sobiq futbolchi va murabbiysi Diyego Armando Maradona “Shapekoense” bilan bir yil avval bo‘lib o‘tgan aviahalokat haqida shaxsiy fikrlarini bildirib o‘tdi.

Maradonaning aytishiga ko‘ra, “Shapekoense” rahbarlari 5 ming dollar tejash maqsadida futbolchilarning o‘limlariga o‘zlari bilmagan holda sababchi bo‘lib qolgan.

“Bugun, futbolda motam kuni. Bilamizki, bir yil muqaddam “Shapekoense” futbol klubining ajoyib yigitlari baxtlarini izlab, samoga ko‘tarilishdi, lekin bilishmasdiki, u yerda ularni bevaqt o‘lim kutardi. Marhum futbolchilarning yaqinlari va muxlislariga hamdardlik bildiraman. Qattiq iztirobdaman.

Bir yil avval hech qanday munosabat bildirmaganimga sabab shunda ediki, o‘shanda rahbarlar 5 ming dollar pulni tejash maqsadida, shuncha aybsiz insonlarning o‘limiga o‘zlari bilmagan holda sababchi bo‘lib qolishgan. O‘ylaymanki, bu so‘zlarning aytish vaqti keldi”, – deya yozadi Maradona Fasebukdagi rasmiy sahifasida.