Аргентина терма жамоасининг собиқ футболчи ва мураббийси Диего Армандо Марадона “Шапекоэнсе” билан бир йил аввал бўлиб ўтган авиаҳалокат ҳақида шахсий фикрларини билдириб ўтди.

Марадонанинг айтишига кўра, “Шапекоэнсе” раҳбарлари 5 минг доллар тежаш мақсадида футболчиларнинг ўлимларига ўзлари билмаган ҳолда сабабчи бўлиб қолган.

“Бугун, футболда мотам куни. Биламизки, бир йил муқаддам “Шапекоэнсе” футбол клубининг ажойиб йигитлари бахтларини излаб, самога кўтарилишди, лекин билишмасдики, у ерда уларни бевақт ўлим кутарди. Марҳум футболчиларнинг яқинлари ва мухлисларига ҳамдардлик билдираман. Қаттиқ изтиробдаман.

Бир йил аввал ҳеч қандай муносабат билдирмаганимга сабаб шунда эдики, ўшанда раҳбарлар 5 минг доллар пулни тежаш мақсадида, шунча айбсиз инсонларнинг ўлимига ўзлари билмаган ҳолда сабабчи бўлиб қолишган. Ўйлайманки, бу сўзларнинг айтиш вақти келди”, – дея ёзади Марадона Фасебукдаги расмий саҳифасида.