Londoning “Arsenal” klubi rahbariyati 2013 yil “Atletiko” hujumchisi Grizmanni sotib olishi mumkin edi. Lekin noma’lum sabablarga ko‘ra ular Yaya Sanogoni Londonga olib kelishgan.

Ma’lum bo‘lishicha, Grizmann 2012/2013 yil mavsumi “Real Sosyedad” futbolchisi sifatida 10 ta gol urgan. Natijada “Arsenal” futbolchini o‘z tarkibiga qo‘shib olish uchun harakatlarni boshlab yuborgan.

“Arsenal” vakili Erik Olats Grizmanning agenti Grimandi bilan muzokaralar o‘tkazgan. Bu haqda Grimandining o‘zi xabar bermoqda.

“Vengerning men bilan aloqaga chiqishini kutdim. Lekin qo‘ng‘iroq bo‘lmadi. Oradan vaqt o‘tib o‘zim ular bilan aloqaga chiqishga majbur bo‘ldim.

Aynan o‘sha vaqt Yevropada transferlar mavsumi yopilishiga ikki soat qolgandi. Go‘shakni Venger ko‘tardi va Grizman bilan shartnoma tuzish istagi yo‘qligini aytdi.

Buni qarangki, yana bir necha yildan so‘ng “Arsenal” vakillari men bilan Grizmann borasida aloqaga chiqishdi. Ustiga-ustak, katta maosh va yaxshigina taklif bildirishgandi. Ammo Grizmanning o‘zi taklif “Arsenal”dan bo‘layotganidan xabar topib, darhol menga yo‘q deyishimni buyurdi”, - deydi Grimandi.