Xalqaro futbol federasiyasi (FIFA) tashkiloti JCH-2018 musobaqasi uchun rasmiy plakatini taqdim etdi.

Rasmiy posterga “Dinamo” klubining sobiq futbolchisi, 1963 yilgi “Oltin to‘p” sovriniga nomzod marhum Lyov Yashinning surati joylandi.

Shuningdek, FIFA musobaqaning qur’a tashlash marosimidagi rasmiy xeshtegi qanday ko‘rinishda bo‘lishiga ham aniqlik kiritdi.

Unga ko‘ra, bugun 1 dekabr kuni bo‘lib o‘tishi rejalashtirilgan qur’a marosimining xeshtegi #Worldcupdraw yozuvli ko‘rinishda bo‘ladi.

Ma’lumot o‘rnida aytib o‘tish joizki, 2018 yil Rossiyada bo‘lib o‘tadigan futbol bo‘yicha jahon chempionatining final bosqichiga qur’a tashlash marosimi ertaga, 1 dekabr kuni Moskvadagi “Gosudarstvenniy Kremlyovskiy dvores” zalida o‘tkaziladi.

Marosim jarayonini Angliya terma jamoasining sobiq futbolchisi, ayni paytda futbol eksperti hisoblanmish Gari Lineker va boshlovchi Mariya Komandnayalar birgalikda olib borishadi.

JCH–2018 final bosqichi 2018 yilning 14 iyun kunidan 15 iyul kuniga qadar Rossiyaning 11 shahri: Moskva, Sankt-Peterburg, Kazan, Sochi, Nijniy Novgorod, Samara, Kaliningrad, Yekaterinburg, Saransk, Volgograd va Rostov na-Donudagi 12 ta stadionda bo‘lib o‘tadi.

Quyida JCH–2018da ishtirok etadigan jamoalarning to‘liq ro‘yxati bilan tanishing: Rossiya, Braziliya, Eron, Yaponiya, Meksika, Belgiya, Janubiy Koreya, Saudiya Arabistoni, Germaniya, Angliya, Ispaniya, Nigeriya, Kosta-Rika, Polsha, Misr, Islandiya, Serbiya, Portugaliya, Fransiya, Urugvay, Argentina, Kolumbiya, Panama, Senegal, Tunis, Marokash, Shveysariya, Xorvatiya, Shvesiya, Daniya, Avstraliya, Peru.

Eslatib o‘tamiz, qur’a tashlash marosimini “Sport” telekanali to‘g‘ridan-to‘g‘ri namoyish etishni rejalashtirgan.