"Milan"ning Italiya chempionatida ishlari yurishmayapti. "Rossoneri" 15-turda ochko yo‘qotdi. Boz ustiga, ushbu mavsumda hali biror ochkoni qo‘lga kirita olmagan "Benevento" "Milan"ga qarshi o‘yinning so‘nggi daqiqalarida mag‘lubiyatdan qutulib qoldi. Bu ishni esa debyutant jamoa darvozaboni amalga oshirdi.

Jennaro Gattuzoning debyut bahsi "Milan" uchun yaxshi kechayotgandi. Bonaventura birinchi bo‘limda "rossoneri"ni hisobda oldinga olib chiqdi. Ikkinchi bo‘limda mezbonlar hisobni tenglashtirishdi, ammo Kalinich tezda yana milanliklarni oldinga olib chiqdi.

O‘yin tugashiga 15 daqiqa qolganida Romanyoli ikkinchi sariq kartochkani olib, maydonni tark etdi. Son jihatdan ustunlikka ega bo‘lgan "Benevento" bor kuchi bilan oldinga tashlandi. Uchrashuvga qo‘shib berilgan 5 daqiqada ular jarima zarbasini tepish huquqini qo‘lga kiritishdi. Yetkazib berilgan uzatmani "Benevento" posboni bosh bilan "Milan" darvozasiga joylab qo‘ydi.

Shu tariqa, "Benevento" mavsumdagi ilk ochkosini qo‘lga kiritdi. "Milan" esa muhim 2 ochkodan mahrum bo‘ldi.

Italiya A seriyasi, 15-tur
Benevento – Milan 2:2 (0:1, 2:1)
Gollar: 0:1 – 38 Bonaventura, 1:1 – 50 Pushkash, 1:2 – 57 Kalinich, 2:2 – 90 Brinyoli.
Benevento – Brinyoli, Gimsiti, Di Kyara (Gyamfi, 79), Letisia, Kosta, Kataldi, Chibsa, D'Alessandro, Memushay (Koda, 80), Paridjini (Brinyola, 67), Pushkash.
Milan – Donnarumma, Bonuchchi, Romanyoli, Rodriges, Musakkyo, Bonaventura, Kessie, Borini (Abate, 60), Montolivo (Bigliya, 73), Suso (Sapata, 87), Kalinich.
Ogohlantirishlar: Romanyoli (24), Kataldi (29), Di Kyara (54), Rodriges (71), Kessie (89), Abate (90), D'Alessandro (90).
Chetlatish: Romanyoli (75).