Mavsum yakunlariga doir ma’lumotlarni davom ettiramiz. Bugungi maqolamizda chempionat davomida raqiblar darvozasiga to‘p kiritgan futbolchilarimiz xususida so‘z yuritamiz.
Akramovdan Sidorovgacha
Joriy mavsumda vakillarimiz raqiblar darvozasiga 42 ta gol urishdi. (Birinchi davrada 23 ta, ikkinchi davrada 19 ta). Bu esa so‘nggi uch yildagi eng yaxshi ko‘rsatkichdir. Jamoamizning mavsum-2017dagi birinchi golini Bahodir Akramov kiritdi. Oliy liga 1-tur doirasidagi Qo‘qonda kechgan “Nasaf”ga qarshi o‘yinda yarim himoyachimiz o‘zini ko‘rsatgandi. Ammo ushbu gol futbolchilarimizni mag‘lubiyatdan qutqara olmagandi.
Mavsumdagi so‘nggi gol muallifi – Andrey Sidorov bo‘ldi. Yosh hujumchimiz jamoamizdagi birinchi golini 30-turda kiritdi. Eng qizig‘i, mazkur bahsda ham futbolchilarimiz “Olmaliq”qa imkoniyatni boy berishdi.
Eng ko‘p gol Berdiyevda
Jamoamizning bu yilgi mavsumdagi to‘purari Suhrob Berdiyev bo‘ldi. Ushbu futbolchimiz 26 ta uchrashuvda maydonga tushib, raqiblar darvozasiga 11 ta to‘p kiritishga muvaffaq bo‘ldi. Suhrob birinchi davrada 6 ta gol urganini ham aytib o‘tish joiz.
Serbiyalik hujumchi Filip Rayevas hisobida 7 ta gol bor. Filip gollarning 6 tasini birinchi davrada kiritgan. Mavsum davomida ushbu hujumchimiz 28 ta uchrashuvda maydonga tushgan.
Jamoamiz sardori Nosir Otaqo‘ziyev hisobidagi gollar soni 6 tani tashkil etadi. Tajribali hujumchi bu yil 23 ta o‘yinda ishtirok etdi.
“Qo‘qon-1912” yuragiga aylangan Murod Xolmuhammedov ham mavsum davomida raqiblarimizni 6 marta ranjitdi. Bu himoyachi uchun juda yaxshi natijadir. Xolmuhammedov mavsumda 29 ta uchrashuv o‘tkazdi.
Qo‘qonlik futbol muxlislarining yana bir yoqimtoyi – Javohir Sidiqov ham mavsumni sermahsul o‘tkazdi, deyish mumkin. Iqtidorli yarim himoyachimiz raqiblar darovzasini 5 marta aniq nishonga olgan. Sidiqov 25 ta o‘yinda maydonga tushgan. Yana bir qiziq jihati shundaki, Javohir to‘rtta golni ikkinchi davrada kiritgan.
Shuningdek, Darko Gojkovich hisobida 3 ta gol bor. Akmal Xolmurodov, Bahodir Akramov, Quvondiq Ro‘ziyev va Andrey Sidorovlar esa raqiblarni bir martadan ranjitishgan.
Yubiley gol
Ushbu mavsumda “Qo‘qon-1912” jamoasi Oliy liga tarixidagi 500-golini kiritdi. Jamoamizning navbatdagi yubiley goliga Murod Xolmuhammedov mualliflik qildi. “Buxoro”ga qarshi safarda o‘tgan uchrashuvda ushbu tarixiy voqea sodir bo‘ldi.
Gollar taqsimoti:
Suhrob Berdiyev – 11
Filip Rayevas – 7
Nosir Otaqo‘ziyev – 6
Murod Xolmuhammedov – 6
Javohir Sidiqov – 5
Darko Gojkovich – 3
Akmal Xolmurodov – 1
Bahodir Akramov – 1
Quvondiq Ro‘ziyev – 1
Andrey Sidorov – 1
Jami gollar: 42 ta
