Avval xabar berilganidek, O‘zbekiston Futbol Federasiyasi xodimlar malakasini oshirish, o‘z kasbining mutaxassisi bo‘lgan insonlar federasiya tarkibida ishlashini ta’minlash maqsadida, yurtimizdagi murabbiylar, hakamlar va viloyat futbol federasiyalari xodimlarini attestasiyadan o‘tkazilishi belgilangandi.
Shunga ko‘ra, noyabr oyida foydalanishga topshirilgan poytaxtimizdagi yengil atletika markazida O‘zbekiston Futbol Federasiyasining attestasiya bo‘yicha komissiyasi tomonidan Oliy liga va Birinchi ligada faoliyat yurituvchi jami 56 nafar bosh hakamlar va laynsmenlar attestasiyadan o‘tkazilmoqda. Bugun kunning birinchi yarmida hakamlar jismoniy mashqlar bo‘ycha sinov topshirdilar. Maxsus komissiya ularning jismoniy holati, chidamliligini tekshiruvdan o‘tkazdi.
Kunning ikkinchi yarmida esa hakamlar "Chig‘atoy" sport bazasida videomateriallardan tayyorlangan testlarni topshiradilar. Bundan tashqari, ulardan FIFA tomonidan futbol qoidalariga kiritilgan ba’zi yangi o‘zgarishlar bo‘yicha yozma imtihon ham olinadi.
