Braziliyalik afsonaviy futbolchi Kaka faoliyatini rasmay yakunlagani haqida ma’lum qildi. 35 yoshli sobiq futbolchining so‘nggi jamoasi «Orlando Siti» bo‘ldi.
«Hayotimni professional tarzda davom ettirishni o‘yladim va bunga biroz vaqt kerak bo‘ldi.
Yaqinlarim bilan suhbatlashdim va bir qator o‘yinlarni kuzatish uchun Yevropaga qaytdim.
Endilikda o‘zimni menejer yoki klub sport direktori sifatida sinab ko‘rishni istayman.
Yaxshi futbolchi bo‘lganligim fakt, ammo bu yaxshi rahbar bo‘lishimni kafolatlamaydi. Shuning uchun yaxshiroq tayyorgarlik ko‘rishni istayman. O‘qiyman, tajriba orttiraman va qaysidir klub bilan bog‘lanaman. Bu men o‘ynagan jamoalardan biri bo‘ladi», — deydi Kaka.
Oldinroq Kaka «Milan»da ish boshlashi haqida xabarlar tarqalgandi. Ma’lumot uchun, braziliyalik futbolchi «qizil-qoralar» tarkibida Italiya chempionati, Chempionlar ligasi, UYEFA superkubogini qo‘lga kiritgan va «Oltin to‘p» sovriniga ega chiqqan.
