XXVI O‘zbekiston chempionatida kumush medalni qo‘lga kiritgan, “Nasaf” futbolchilari dam olishdan  qaytib kelishdi va 15 dekabrdan o‘z qarorgohida yangi mavsum tayyorgarligini boshladi. Mashg‘ulotlar klub qarorgohida bo‘lib o‘tmoqda.

Mashg‘ulotlarda Doniyorjon Narzullayev, Azizjon G‘aniyev, Sharof Muhitdinov, Bobir Abduxoliqov va Odiljon Hamrobekovlar ishtirok etishmayapti. O‘zingizga ma’lum, ushbu futbolchilarimiz 2018 yil 21 yanvargacha U-23 terma jamoamiz ixtiyorida bo‘lishadi.

Serbiyalik legioner hujumchimiz Dragan Cheran 20 dekabrdan mashg‘ulotlarga qo‘shiladi. Yana bir legionerimiz Igor Golban esa mashg‘ulotlarga 15 dekabrdan kirishgan.

“Nasaf” 22 dekabr kuni U-23 terma jamoamiz bilan o‘rtoqlik uchrashuvi o‘tkazadi. Ushbu uchrashuv, shu kuni Qarshi shahridagi “Markaziy” stadionimizda soat 15:00da boshlanadi.

Jamoamizning dekabr oyidagi rejasiga ko‘ra, 26 dekabr kuni futbolchilarimiz me’yoriy talablar bo‘yicha sinovdan o‘tishadi va shu kuni tantanali taqdirlash marosimida ham ishtirok etishadi. Dekabr oyi tayyorgarlik mashg‘ulotlari 28 dekabr kuni nihoyasiga yetadi. Shu kuni jamoamiz yana bir nazorat uchrashuvida maydonga tushishi mumkin. Shundan so‘ng futbolchilarimiz yangi yil bayrami munosabati bilan qisqa ta’tilga chiqishadi.

Muxlislarimizni ko‘proq qiziqtiradigan tarkibdagi o‘zgarishlar haqida hozircha yangilik yo‘q.