XXVI Ўзбекистон чемпионатида кумуш медални қўлга киритган, “Насаф” футболчилари дам олишдан  қайтиб келишди ва 15 декабрдан ўз қароргоҳида янги мавсум тайёргарлигини бошлади. Машғулотлар клуб қароргоҳида бўлиб ўтмоқда.

Машғулотларда Дониёржон Нарзуллаев, Азизжон Ғаниев, Шароф Муҳитдинов, Бобир Абдухолиқов ва Одилжон Ҳамробековлар иштирок этишмаяпти. Ўзингизга маълум, ушбу футболчиларимиз 2018 йил 21 январгача U-23 терма жамоамиз ихтиёрида бўлишади.

Сербиялик легионер ҳужумчимиз Драган Черан 20 декабрдан машғулотларга қўшилади. Яна бир легионеримиз Игорь Голбан эса машғулотларга 15 декабрдан киришган.

“Насаф” 22 декабр куни U-23 терма жамоамиз билан ўртоқлик учрашуви ўтказади. Ушбу учрашув, шу куни Қарши шаҳридаги “Марказий” стадионимизда соат 15:00да бошланади.

Жамоамизнинг декабр ойидаги режасига кўра, 26 декабр куни футболчиларимиз меъёрий талаблар бўйича синовдан ўтишади ва шу куни тантанали тақдирлаш маросимида ҳам иштирок этишади. Декабр ойи тайёргарлик машғулотлари 28 декабр куни ниҳоясига етади. Шу куни жамоамиз яна бир назорат учрашувида майдонга тушиши мумкин. Шундан сўнг футболчиларимиз янги йил байрами муносабати билан қисқа таътилга чиқишади.

Мухлисларимизни кўпроқ қизиқтирадиган таркибдаги ўзгаришлар ҳақида ҳозирча янгилик йўқ.