«Navbahor»ning Toshkentda o‘tkazilayotgan yig‘ini davom etmoqda. Mashg‘ulotlar kuniga ikki mahaldan o‘tkazilmoqda. Tarkibda ro‘y berayotgan o‘zgarishlar haqida gap ketganida, bugun jamoa safiga to‘rt nafar yoshlar jamoasi a’zolarini qo‘shilganligini aytish joiz. Yunusbek Abduvohidov, Akmal Turg‘unboyev, Abbos G‘ulomov va Muzaffar Abdullayev — shular jumlasidandir. Ushbu futbolchilar bugungi mashg‘ulotlarda ishtirok etishdi.

Bundan biroz vaqt oldin esa «Navbahor»ning Toshkentdagi vaqtinchalik qarorgohiga Zohir Pirimov va Azamat Allaniyozov yetib kelishdi. Ushbu futbolchilar jamoa bosh murabbiyi Ilhom Mo‘minjonov bilan suhbatda bo‘lib, ayrim masalalarda o‘zaro kelishuvga erishishdi. Ertadan har ikki futbolchi ham mashg‘ulotlarga qo‘shiladi. Yodingizda bo‘lsa Zohir Pirimov o‘tgan yilgi mavsum avvalida ham namanganliklar mashg‘ulotlarida qatnashgandi. Lekin, chempionat boshlanishidan oldin "Buxoro" klubiga o‘tib ketgandi. Azamat Allaniyozov esa 2017 yilgi mavsumni "Qizilqum"da boshlab davralar oralig‘ida "Buxoro" jamoasiga ko‘chib o‘tgandi.

Toshkentdagi yig‘in davomida to‘rtta nazorat o‘yini o‘tkazilishi haqida ma’lumot bergandik. Dastlabki uchrashuv 11 yanvar kuni "Oq-tepa" jamoasiga qarshi o‘tkaziladi. Mazkur o‘yin "Oq-tepa" o‘yingohida soat 15:00 da boshlanadi.