Shu kunlarda Farg‘onaning “Neftchi” jamoasi Qirgulidagi “Neftchi” SK stadionida mashg‘ulotlarni olib bormoqda. Murabbiylar shtabidagi Murod Ismoilov, Sergey Lebedev hamda Bahrom Haydarov kabi tajribali mutaxassislar futbolchilar bilan ishlayotgan bo‘lsa, Bahodir Shamshiddinov darvozabonlarni shug‘ullantirmoqda. Kundalik asosiy jarayon shundan iborat sanaladi. Avval xabar berib o‘tganimizdek, qishki o‘quv-mashg‘ulot yig‘inlari bir mahaldan o‘tkazilmoqda.

Bugun jamoaning joriy yildagi dastlabki uchrashuvi Quvasoyning “Sementchi” jamoasiga qarshi bo‘lib o‘tadi. Aytish kerakki, mazkur o‘rtoqlik o‘yini xar ikkala jamoa uchun ham anchayin foydali sanaladi. “Neftchi” jamoasining mazkur o‘yindan asosiy ko‘zlagan maqsadi, jamoa ko‘rigida bo‘lib turgan bir qator farg‘onalik yosh futbolchilarni sinovdan o‘tkazish va qishki yig‘in chog‘ida futbolchilarga ko‘proq o‘yin amaliyoti taqdim etishdan iboratdir. Shuningdek, quvasoyliklar ham mazkur bellashuv orqali ko‘rikdagi yangi ijrochilarni ko‘zdan kechiradi. Bu “Neftchi” jamoasi uchun mazkur haftadagi yagona o‘yin emas. Shanba kuni farg‘onaliklarni viloyatining yana bir jamoasiga qarshi o‘yin kutmoqda.

Ma’lumot o‘rnida, bugungi o‘rtoqlik o‘yini Qirgulidagi “Neftchi” SK stadionida soat 11:00da boshlanadi.  Derbiga marhabo!

“Neftchi” PFK matbuot xizmati