Ispaniya kubogining 1/8 final bosqichi javob o‘yini doirasida «Barselona» o‘z maydonida «Selta»ni qabul qiladi. Rossiyalik taniqli sharhlovchi Konstantin Genich mazkur o‘yin borasida o‘z taxminlarini bildirib o‘tdi.

«Ispaniya kubogining 1/8 final bosqichi doirasidagi eng yorqin to‘qnashuv «Barselona» va «Selta» o‘rtasida bo‘lib o‘tadi. Boisi, Vigo shahri jamoasi «Barselona»ga qarshi o‘yinda 2 marta yutqazmadi. Chempionat doirasida «Kamp Nou»da bo‘lib o‘tgan o‘yin 2:2 hisobidagi durang bilan yaknlangan bo‘lsa, bir hafta avval Kubokning dastlabki o‘yini 1:1 hisobida tugagan. Lekin «Barsa» Kubok bahsida Messi, Inyesta, Suares va boshqa yetakchilarsiz o‘ynagandi. Bu safar esa Valverde o‘zining eng kuchli shogirdlari xizmatidan foydalana oladi. Faqat Filippe Koutinyo jarohat tufayli hozircha maydonga tusha olmaydi.

«Selta» futbolchilarida toliqish alomati bo‘lishi kerak. Boisi, ular yangi yilning dastlabki 2ta o‘yinini «Barsa» va «Real»ga qarshi murakkab o‘yinlarni o‘tkazishdi. Ayniqsa, madridliklarga qarshi o‘yinda vigoliklar katta kuch sarflashdi. Nazarimda, bo‘lajak o‘yinda «Selta»ga jismoniy kuch yetmay qolishi mumkin. Mehmonlar birinchi bo‘limda qarshilik ko‘rsata olishlari mumkin, ammo ikkinchi taymda ularga ancha qiyin bo‘ladi. Boisi, Xuan Karlos Unsue tarkib borasida rotasiyani amalga oshirmadi», - dedi Genich.