Испания кубогининг 1/8 финал босқичи жавоб ўйини доирасида «Барселона» ўз майдонида «Сельта»ни қабул қилади. Россиялик таниқли шарҳловчи Константин Генич мазкур ўйин борасида ўз тахминларини билдириб ўтди.

«Испания кубогининг 1/8 финал босқичи доирасидаги энг ёрқин тўқнашув «Барселона» ва «Сельта» ўртасида бўлиб ўтади. Боиси, Виго шаҳри жамоаси «Барселона»га қарши ўйинда 2 марта ютқазмади. Чемпионат доирасида «Камп Ноу»да бўлиб ўтган ўйин 2:2 ҳисобидаги дуранг билан якнланган бўлса, бир ҳафта аввал Кубокнинг дастлабки ўйини 1:1 ҳисобида тугаган. Лекин «Барса» Кубок баҳсида Месси, Иньеста, Суарес ва бошқа етакчиларсиз ўйнаганди. Бу сафар эса Вальверде ўзининг энг кучли шогирдлари хизматидан фойдалана олади. Фақат Филиппе Коутиньо жароҳат туфайли ҳозирча майдонга туша олмайди.

«Сельта» футболчиларида толиқиш аломати бўлиши керак. Боиси, улар янги йилнинг дастлабки 2та ўйинини «Барса» ва «Реал»га қарши мураккаб ўйинларни ўтказишди. Айниқса, мадридликларга қарши ўйинда виголиклар катта куч сарфлашди. Назаримда, бўлажак ўйинда «Сельта»га жисмоний куч етмай қолиши мумкин. Меҳмонлар биринчи бўлимда қаршилик кўрсата олишлари мумкин, аммо иккинчи таймда уларга анча қийин бўлади. Боиси, Хуан Карлос Унсуэ таркиб борасида ротацияни амалга оширмади», - деди Генич.