Xabaringiz bor, ayni paytda O‘zbekiston chempioni – “Lokomotiv” Dubayda yangi mavsum hozirligini davom ettirmoqda.

“Temiryo‘lchilar” safida bir qator yangi futbolchilar yig‘inda ishtirok etishayotganini qayd etish joiz. Jumladan, rossiyalik 25 yoshli hujumchi  Dmitriy Barkov hamda 24 yoshli koreyalik hujumchi Cho Sok Je  hozirda “Lokomotiv” mashg‘ulotlarida qatnashishmoqda. Bugun “Lokomotiv”ning “Aberdin”ga qarshi o‘tkazgan o‘rtoqlik o‘yinida mazkur futbolchilar ham maydonga tushishdi.

Ta’kidlash joizki, Dmitriy Barkov ilgari “Tosno” (Rossiya), “Narva Trans” (Estoniya), “Istiqlol” (Tojikiston) kabi jamoalar sharafini himoya qilgan. Koreys futbolchisi esa “Chonbuk Motors” tarbiyalanuvchisi hisoblanadi va bunga qadar “Chonnam Dragons”, “Anyang” kabi Janubiy Koreya klublari safida faoliyat olib borgan.

Shu o‘rinda ertaga “Lokomotiv” shartnoma imzolagan yangi futbolchilari nomini e’lon qilishini ma’lum qilamiz.