Хабарингиз бор, айни пайтда Ўзбекистон чемпиони – “Локомотив” Дубайда янги мавсум ҳозирлигини давом эттирмоқда.

“Темирйўлчилар” сафида бир қатор янги футболчилар йиғинда иштирок этишаётганини қайд этиш жоиз. Жумладан, россиялик 25 ёшли ҳужумчи  Дмитрий Барков ҳамда 24 ёшли кореялик ҳужумчи Чо Сок Жэ  ҳозирда “Локомотив” машғулотларида қатнашишмоқда. Бугун “Локомотив”нинг “Абердин”га қарши ўтказган ўртоқлик ўйинида мазкур футболчилар ҳам майдонга тушишди.

Таъкидлаш жоизки, Дмитрий Барков илгари “Тосно” (Россия), “Нарва Транс” (Эстония), “Истиқлол” (Тожикистон) каби жамоалар шарафини ҳимоя қилган. Корейс футболчиси эса “Чонбук Моторс” тарбияланувчиси ҳисобланади ва бунга қадар “Чоннам Драгонс”, “Анянг” каби Жанубий Корея клублари сафида фаолият олиб борган.

Шу ўринда эртага “Локомотив” шартнома имзолаган янги футболчилари номини эълон қилишини маълум қиламиз.