Ummonga qarshi uchrashuvdan so‘ng uchrashuvning eng yaxshi futbolchisi deb e’tirof etilgan terma jamoa himoyachisi Doston Tursunov OFK vakillari savollariga javob berdi.
“Gol urganimdan albatta, baxtliman. Gol urib, jamoaga g‘alaba keltirish yoqimli. Chorak final yo‘llanmasini qo‘lga kiritganimiz bizga yana kuch beradi. Endi keyingi uchrashuvga bundan ham jiddiyroq tayyorgarlik ko‘ramiz”, - dedi himoyachi.
- Raqib bugun qanday taassurot qoldirdi?
- Ummon yoshlar terma jamoasi bizga juda yoqdi. Jamoa bugun ajoyib o‘ynadi. To‘pni ushlab turish, tezkor hujumlar, umuman guruhdagi eng qiyin raqib aynan Ummon deya olaman.
- Chorak finalda kim raqib bo‘lishini istaysiz? Masalan, Yaponiya hozir guruhda birinchi o‘rinni qo‘lga kiritishi mumkin.
- Chorak finalda kuchsiz jamoa bo‘lmaydi va bizga kim raqib bo‘lishidan qat’iy nazar biz faqat g‘alaba uchun o‘ynaymiz.
- Bugungi uchrashuvda jamoadoshlaringizning o‘yinidan ko‘nglingiz to‘ldimi?
- Biz bugungi uchrashuvda bir jamoa sifatida harakat qildik. G‘alaba jamoaniki. Jamoa qanday harakat qilgani haqida fikr bildirish biroz qiyin.
