O‘zbekiston futbol federasiyasi tomonidan mamlakatimizda bolalar va o‘smirlar o‘rtasida sog‘lom turmush tarzini targ‘ib qilish va futbolni ommalashtirish, iste’dodli bolalarni saralab olish borasida bir qator chora-tadbirlar amalga oshirilmoqda.
Jumladan, bolalar futboli murabbiylarini malakasini oshirish uchun xorijdan mutaxassislar taklif qilinyapti, turli yoshdagi bolalar o‘rtasida futbol musobaqalari va festivallar tashkil etilmoqda.
2018 yilda butun respublika bo‘ylab 1000ga yaqin chempionatlar, birinchiliklar, Kubok bellashuvlari, musobaqalar va festivallar o‘tkazish rejalashtirilgani haqida avval xabar berib o‘tgandik.
“Kelajagimiz umidlari” deb nomlangan futbol festivali 18 yanvardan boshlab butun vodiy bo‘ylab start oladi. Andijon, Farg‘ona, Namangan viloyatlaridan boshlanadigan ushbu festivalda har bir viloyatda 7 yoshdan 10 yoshgacha bo‘lgan 400 nafardan bolalar qatnashadi.
Aytish kerakki, “Kelajagimiz umidlari” festivali vodiydan boshlanib, butun respublika bo‘ylab davom etadi. Festival davomida ishtirokchilariga sovg‘a sifatida to‘plar, sport formalari taqdim qilinadi.
Quyida "Kelajagimiz umidlari" futbol festivali yanvar oyida qaysi hududlarda bo‘lib o‘tishi ko‘rsatilgan:
Andijon viloyati – 18-21 yanvar
Farg‘ona viloyati – 20-23 yanvar
Namangan viloyati – 20-23 yanvar
Xorazm viloyati – 27-30 yanvar
Qoraqalpog‘iston Respublikasi – 28-31 yanvar
