«Chelsi» bosh murabbiyi Antonio Konte Aleksis Sanchesning «Manchester Yunayted»ga o‘tgani borasida o‘z fikrlarini bildirib o‘tdi.

«Manchesterning har ikala klubi — baquvvat. Ularni jadvalda ortda qoldirish oson ish emas. Ular futbolchilarni sotib olish uchun katta pullarni sarflashmoqda. Sanchesning transferiga ahamiyat bering. Faqat ikki jamoa uning maoshini to‘lashga qodir.

Lekin bu bozor. Neymarni sotib olishni istasang, unga 25 mln funt maosh to‘lashing kerak. Messi, Ronaldu yoki Sanchesni kiritishni istasang, ularga maosh to‘lashga tayyor bo‘lishing kerak. Sanches katta maosh talab qilgani bois biz u uchun kurashga qo‘shilmadik.

Biz o‘z jamoamizni kuchaytirishimiz kerak. «Chelsi» tarixini yaratgan bir necha yoshi katta futbolchilar so‘nggi yillarda safimizni tark etishdi. Hozir biz o‘tish davrini boshimizdan kechiryapmiz. Ushbu mavsumni omadli kechyapti deb ayta olaman. Sovrin muhim emas, muhimi, murabbiylar va futbolchilar sidqidildan ishlashmoqda», – dedi Konte.