23 yoshgacha bo‘lgan futbolchilar o‘rtasida Osiyo chempionatining yarim finalida O‘zbekiston olimpiya terma jamoasi Janubiy Koreyani mag‘lub etdi (4:1). Uchrashuvda hal qiluvchi gollardan biriga Azizjon G‘aniyev mualliflik qildi. 20 yoshli futbolchi qo‘shimcha bo‘limlar boshlanganidan keyin oradan 10 daqiqa o‘tib olis masofadan kuchli zarba yo‘lladi va raqib darvozasini ishg‘ol qildi. "Nasaf" o‘yinchisi OFK rasmiy saytiga intervyu berib, yarim final va final bahslarida haqida o‘z fikrlarini bildirib o‘tdi.

"Bu hayotimdagi eng ajoyib va muhim gol bo‘ldi. Men bu golni akamga bag‘ishlayman. O‘yindan oldin u bilan gaplashganimda, gol urishim kerakligini ta’kidlagandi. Shu bois, men gol urishga intildim. Xudoga shukr, orzum amalga oshdi. Agar gol ursam, uni salto orqali nishonlashimni oilamga aytgandim", — dedi G‘aniyev.

"Biz jamoaviy o‘yin orqali finalgacha yetib keldik. Buning uchun barcha ko‘p mehnat qildi. Agar finalda g‘olib chiqsak, bu O‘zbekiston uchun tarixiy g‘alabaga aylanadi", — dedi Azizjon.