Xitoyda davom etayotgan 23 yoshgacha bo‘lgan futbolchilar o‘rtasidagi Osiyo chempionatida ertaga, 27 yanvar kuni final bahsi bo‘lib o‘tadi. Changjou shahrida O‘zbkeiston va Vyetnam terma jamoalari o‘zaro bahs olib borishadi. Vyetnamliklar darvozaboni Buy Tyan Dung o‘yin oldidan OFK rasmiy saytiga intervyu berdi.

Ushbu posbon Iroq va Qatarga qarshi bo‘lib o‘tgan qit’a chempionatining chorak final va yarim final bahslarida o‘yindan keyin penaltilar seriyasida raqibning bir nechta zarbalarini qaytarib, jamoasining finalgacha yetib kelishida katta hissa qo‘shdi.

"Dekabr oyida Tailandda o‘tkazilgan xalqaro musobaqa doirasida O‘zbekiston bilan to‘qnash kelgandik (O‘zbekiston 2:1 hisobida g‘alaba qozongan — stadion.uz izohi). O‘zbekistonni kuchli jamoa deb hisoblayman. Ular finalgacha yetib kelishdimi, demak, kuchli jamoa. Lekin biz ham finalgacha yetib keldik va 100 foiz kuch bilan harakat qilishga tayyormiz", — dedi Buy Tyan Dung.

"Qatarga qarshi uchrashuvdan keyin mehmonxonaga keldik va o‘yinni qaytadan tomosha qildik. Ijtimoiy tarmoqlarda muxlislarimizning bayram qilayotganiga guvoh bo‘ldik. Vyetnamliklar yarim final o‘yinidan keyin ko‘chaga chiqib, g‘alabani bayram qilishgan. Ishqibozlarimizga bu darajada quvonch hadya etganimizga ishongim kelmadi. Barcha Vyetnam xalqiga rahmat demoqchiman", — dedi darvozabon.