"Paxtakor"ning sobiq futbolchisi va xizmat ko‘rsatgan murabbiy bugun 76 yoshini qarshi olgan bo‘lardi.   "Paxtakor" tarbiyalanuvchisi sanalgan Hamid Rahmatullayev klubda uchinchi avlod vakili sanaladi. U Birodar Abduraimov, Dmitriy An, Vladimir Shtern bilan birga futbol sirlarini o‘rgangan. 1962 yil Rahmatullayev 6-pog‘ona egallanishida o‘z yordamini qo‘shgan. Keyingi mavsum esa unga juda qiyin kechgan. Jarohati sababli futbolni tugatish haqida maslahat berishgan. Lekin bir yillik tanaffusdan so‘ng u jamoaning yuqori ligaga qaytishiga hissa qo‘shib, 8 uchrashuvda bir gol muallifiga aylangan.   Hamid Turg‘unovich "Paxtakor" uchun jami 11 mavsum davomida o‘ynagan. 1960-yillarda bunday barqarorlik bilan faqat uning do‘stlari Gennadiy Krasniskiy va Birodar Abduraimov yodda qolgan. Yarim himoyada o‘ynagan Rahmatullayev hamisha sermahsul o‘yinlari bilan ajralib turgan. Yorqin o‘yinlari sababli uni yurtimizdagi ishqibozlar "o‘zbek Pelesi" sifatida e’tirof etishgan.   Futbolchilik faoliyatini yakunlagach, Rahmatullayev qadrdon klubida ma’muriy va rahbarlik lavozimlarida ishladi. 1970-yillarning ikkinchi yarmida afsonaviy jamoa shakllanishida ishtirok etdi. U 1978 yil aprel oyida ro‘y bergan avtohalokatda hayotdan ko‘z yumgan.   2000 yilning mart oyida Toshkent shahar Shayxontohur tumanida "Paxtakor" stadioniga yaqin hududda ko‘chalardan biriga uning nomi berildi. Hamid Rahmatullayev nomi O‘zbekiston futboli tarixiga alohida bitib qo‘yilgan.   Uning o‘g‘li Sardor Rahmatullayev uzoq yillardan beri O‘zbekiston futbol assosiasiyasi bosh kotibi sifatida faoliyat ko‘rsatmoqda.   "Paxtakor" futbol klubi jamoa uchun katta mehnati singgan va klub shakllanishida faollik ko‘rsatgan Hamid Rahmatullayevning oila a’zolariga minnatdorchilik bildiradi. Uning xotirasi har doim yodimizda saqlanadi.