Xabaringiz bor, kuni kecha O‘zbekiston Olimpiya terma jamoasi Osiyo chempionligiga erishib, yurtimizga qaytganidan keyin poytaxtimizda ularni tantanali ravishda kutib olish marosimi o‘tkazildi.
O‘zbekiston Milliy Olimpya Qo‘mitasi prezidenti, O‘zbekiston Futbol Assosiasiyasi 1-vise-prezidenti Umid Ahmadjonov Osiyo chempionlarini kutib olish marosimida ishtirok etib, futbolchilarimiz va murabbiylarga ana shu yuksak natija uchun cheksiz minnatdorchilik bildirdi va ularni chempionlik bilan qutladi.
Kecha 29 yanvar kuni esa futzal bo‘yicha O‘zbekiston terma jamoasi a’zolarini Osiyo chempionatiga kuzatish marosimi o‘tkazildi. Ushbu marosimda ishtirok etgan Umid Ahmadjonov futzalchilarimizga ham O‘zbekiston OTJ yo‘lini tilab, xalqimiz ulardan ham Osiyo chempionatida yuksak natijalar kutayotganini ta’kidlab o‘tdi. Shuningdek, Umid Ahmadjonov O‘zbekiston futbol Assosiasiyasi futzalchilarimizga qit’a chempionatida munosib ishtirok etish va chempionlikka erishishlari uchun zarur bo‘lgan barcha sharoitlarni yaratib berishga tayyor ekanini ham ma’lum qildi.
Bugun esa Umid Ahmadjonov Osiyo chempionlar ligasi pley-off bahsidan o‘rin olgan “Al-Garafa”ga qarshi uchrashuvda O‘zbekiston vakili bo‘lgan “Paxtakor” jamoasini qo‘llab-quvvatlash uchun O‘FA Ijroqo‘mi a’zosi, "Paxtakor" FK prezidenti Bobur Shodiyev bilan birga Qatar poytaxti Dohaga yo‘l oldi.
Eslatib o‘tamiz, OCHL pley-offidan o‘rin olgan “Al-Garafa” – “Paxtakor” uchrashuvi Toshkent vaqti bilan soat 22:00da boshlanadi.
