Хабарингиз бор, куни кеча Ўзбекистон Олимпия терма жамоаси Осиё чемпионлигига эришиб, юртимизга қайтганидан кейин пойтахтимизда уларни тантанали равишда кутиб олиш маросими ўтказилди.
Ўзбекистон Миллий Олимпя Қўмитаси президенти, Ўзбекистон Футбол Ассоциацияси 1-вице-президенти Умид Аҳмаджонов Осиё чемпионларини кутиб олиш маросимида иштирок этиб, футболчиларимиз ва мураббийларга ана шу юксак натижа учун чексиз миннатдорчилик билдирди ва уларни чемпионлик билан қутлади.
Кеча 29 январь куни эса футзал бўйича Ўзбекистон терма жамоаси аъзоларини Осиё чемпионатига кузатиш маросими ўтказилди. Ушбу маросимда иштирок этган Умид Аҳмаджонов футзалчиларимизга ҳам Ўзбекистон ОТЖ йўлини тилаб, халқимиз улардан ҳам Осиё чемпионатида юксак натижалар кутаётганини таъкидлаб ўтди. Шунингдек, Умид Аҳмаджонов Ўзбекистон футбол Ассоциацияси футзалчиларимизга қитъа чемпионатида муносиб иштирок этиш ва чемпионликка эришишлари учун зарур бўлган барча шароитларни яратиб беришга тайёр эканини ҳам маълум қилди.
Бугун эса Умид Аҳмаджонов Осиё чемпионлар лигаси плей-офф баҳсидан ўрин олган “Ал-Гарафа”га қарши учрашувда Ўзбекистон вакили бўлган “Пахтакор” жамоасини қўллаб-қувватлаш учун ЎФА Ижроқўми аъзоси, "Пахтакор" ФК президенти Бобур Шодиев билан бирга Қатар пойтахти Доҳага йўл олди.
Эслатиб ўтамиз, ОЧЛ плей-оффидан ўрин олган “Ал-Гарафа” – “Пахтакор” учрашуви Тошкент вақти билан соат 22:00да бошланади.
