2018 yilgi Superliga bahslari boshlanishiga sanoqli kunlar qolayotganda mavsum ishtirokchilari o‘z saflarini mustahkamlashga jiddiy e’tibor qaratishmoqda. Bekobodning “Metallurg” jamoasi ham bundan mustasno emas.

Ushbu haftadan ma’danchilar tarkibida yana ikki nafar yangi futbolchi paydo bo‘ldi. Jumladan, o‘tgan mavsumning ikkinchi yarmini ijara asosida Farg‘onaning “Neftchi” jamoasida o‘tkazgan himoyachi Dostonbek Tursunov U-23 Osiyo chempionatidagi yorqin g‘alabalardan keyin qadrdon “Metallurg” jamoasiga qaytdi. Dostonbek aynan bekobodliklar safida o‘ynayotgan kezlari O‘zbekiston olimpiya terma jamoasi murabbiylari nazariga tushgandi.

Doston Tursunov bilan birga yana bir Osiyo chempioni – Abbosjon Otaxonov ham “Metallurg” jamoasi safiga kelib qo‘shildi. Toshkentning “Paxtakor” jamoasida ulg‘ayib, o‘tgan mavsumni Namanganning “Navbahor” jamoasida o‘tkazgan Abbos Otaxonov “Metallurg” bilan bir yillik shartnomaga imzo chekdi. Biz har ikkala Osiyo chempionlarimizga “Metallurg” safiga xush kelibsizlar, deymiz!