Ispaniya kubogida finalga chiqqan ikkinchi jamoa aniq bo‘ldi. "Barselona" klubi javob o‘yinida ham "Valensiya"ni mag‘lub etishga muvaffaq bo‘ldi.

"Mestalya" bo‘lib o‘tgan bahsda ustunlik kataloniyaliklar tomonida bo‘ldi. Ikkinchi bo‘lim boshida Luis Suares chap qanotda bir himoyachini aldab o‘tib, jarima maydonchasiga uzatma berdi. Zaxiradan maydonga tushgan Koutinyo bir amallab to‘pga yetib oldi va aniq zarba bilan hisobni ochishga muvaffaq bo‘ldi. Bu Felippe uchun "Berselona" libosidagi ilk gol bo‘ldi.

Uchrashuv tugashiga 8 daqiqa qolganida yana o‘sha Suares himoyachining xatosidan so‘ng to‘pni egallab oldi va Rakitichga uzatma berdi. Ivan deyarli birga-bir vaziyatda darvozani ishg‘ol qildi.

Eslatib o‘tamiz, "Kamp Nou"da bo‘lib dastlabki o‘yinda "Barsa" 1:0 hisobida g‘olib chiqqandi. Shu tariqa, Valverde shogirdlari Ispaniya Qirollik kubogi musobaqasining finalida o‘ynaydigan bo‘ldi. "Ko‘k-anorranglilar"ga "Sevilya" raqiblik qiladi.

Ispaniya kubogi, yarim final, javob o‘yini
"VALENSIYA" - "BARSELONA" 0:2
Gollar: 0:1 – 49 Koutinyo, 0:2 – 82 Rakitich.
Valensiya – Domenek, Gabriel, Gayya, Montoyya, Garay (Ruben Vezu, 71), Parexo, Kondogbia, Koklen (Gonsalu Gedesh, 55), Rodrigo (Soler, 55), Vyetto, Dzadza.
Barselona – Sillessen, Umtiti, Pike (Mina, 83), Alba, Andre Gomesh (Koutinyo, 46), Serdji Roberto, Buskets, Rakitich, Inyesta (Paulinyo, 65), Messi, Suares.
Ogohlantirishlar: Rodrigo (34), Dzadza (75), Parexo (90).
Dastlabki o‘yin: 0:1