«Manchester Siti» bosh murabbiyi Pep Gvardiola «Lester»ga qarshi bo‘lib o‘tgan o‘yin (5:1) borasida o‘z fikrlarini bildirib o‘tdi.

«Biz birinchi bo‘limni juda yaxshi boshladik va gol urishga muvaffaq bo‘ldik. Shundan so‘ng esa o‘yin ritmini yo‘qotib qo‘ydik va sekin harakatlana boshladik. Raqibning bir nechta qarshi hujumlarini o‘tkazib yubordik. «Lester»ga qarshi o‘yinlarda bunga yo‘l qo‘yib bo‘lmaydi. Boisi, ularning tarkibida Jeymi Vardi kabi tezkor futbolchilar bor.

Ikkinchi bo‘lim boshida gol urdik. Shundan so‘ng o‘yinni to‘liq nazorat qildik. Bir kishi 4ta gol urarkan, shubhasiz, u uchrashuv qahramoni bo‘ladi. Aguero har bir to‘p uchun kurashdi, juda yaxshi o‘ynadi va 4ta gol urdi. Bu biz uchun kerak edi, muhim edi.

Biz barcha o‘yinlarda deyarli bir xil harakat qilamiz. Ba’zida barcha imkoniyatlarimizdan foydalana olmaymiz. Shunday ruhda harakatlanishda davom etishimiz kerak va mavsumni muvaffaqiyatli yakunlashimiz kerak», – dedi Gvardiola.