«Манчестер Сити» бош мураббийи Пеп Гвардиола «Лестер»га қарши бўлиб ўтган ўйин (5:1) борасида ўз фикрларини билдириб ўтди.

«Биз биринчи бўлимни жуда яхши бошладик ва гол уришга муваффақ бўлдик. Шундан сўнг эса ўйин ритмини йўқотиб қўйдик ва секин ҳаракатлана бошладик. Рақибнинг бир нечта қарши ҳужумларини ўтказиб юбордик. «Лестер»га қарши ўйинларда бунга йўл қўйиб бўлмайди. Боиси, уларнинг таркибида Жейми Варди каби тезкор футболчилар бор.

Иккинчи бўлим бошида гол урдик. Шундан сўнг ўйинни тўлиқ назорат қилдик. Бир киши 4та гол ураркан, шубҳасиз, у учрашув қаҳрамони бўлади. Агуэро ҳар бир тўп учун курашди, жуда яхши ўйнади ва 4та гол урди. Бу биз учун керак эди, муҳим эди.

Биз барча ўйинларда деярли бир хил ҳаракат қиламиз. Баъзида барча имкониятларимиздан фойдалана олмаймиз. Шундай руҳда ҳаракатланишда давом этишимиз керак ва мавсумни муваффақиятли якунлашимиз керак», – деди Гвардиола.