Xabaringiz bor, ertaga OCHLning 1-turi doirasida “Lokomotiv” o‘z maydonida BAAning “Al Vahda” jamoasi bilan to‘p suradi. Ushbu uchrashuvdan oldingi matbuot anjumanida “temiryo‘lchilar” bosh murabbiyi Andrey Miklyayev hamda futbolchi Ikrom Aliboyevlar qatnashishdi.
Andrey Miklyayev: - Barchani kirib kelgan yangi mavsum bilan tabriklayman. Bunday ob-havoda to‘p surish juda yoqimli bo‘ladi. Bo‘lajak o‘yinga tayyorgarlik ko‘ryapmiz. “Lokomotiv” ikkita yaxshi yig‘inni o‘tkazdi. Unda 6 o‘yinda maydonga tushdik. Bunda jamoa a’zolarining qanday jismoniy holatda ekanligini tekshirib oldik. “Al Vahda” bilan uchrashuvning muximligini tushunib turibman. Bunday holatlarda biz nafaqat jismoniy, balki, ruhiy tomondan ham tayyor bo‘lishimiz lozim. Bahsda g‘alaba qozonishni maqsad qilganmiz va bunga qattiq harakat qilamiz. Umid qilamanki, omad biz tomonda bo‘ladi.
Raqiblar haqida bizda yetarlicha ma’lumotlar bor. Jamoa 20ga yaqin uchrashuvda mag‘lubiyatga uchramagan. Ularning o‘yinlarini diqqat bilan kuzatib chiqdik.
Ularning 4 legioneri Toshkentga kelmagani haqida endi eshityapman. Shu boisdan bu haqda o‘ylamayman. To‘rt nafarmi yoki undanda ko‘proq, maqsadimiz maydonga tushib, g‘alabaga erishish. Kimdur muxim o‘yinlarga yetib kela olmadimi, demak ularning o‘rniga boshqa kuchli futbolchilar maydonga tushishadi. Chunki klubda professionallar ishlashadi.
Yigitlar ham jismoniy, ham ruhiy tomonlama uchrashuvga tayyor. Hech qanday yo‘qotishlar yo‘q. Muammo shundaki, bizda futbolchilar juda ko‘p. Bahsga tarkibni tanlashda qiynalyapmiz. Agarda protokolga 20 futbolchi kiritilganda ham, bizga bu kamlik qiladi.
Ikrom Aliboyev: - “Al Vahda” Osiyoda o‘z o‘rniga ega jamoadir. Garchi legionerlarini Toshkentga olib kelmagan bo‘lsa ham, yaxshi saviyali mahalliy futbolchilari bor. Biz bu klubning barcha jihatlarini o‘rganib chiqdik. Xudo xohlasa ertaga chiroyli o‘yinimizni ko‘rsatib, muxlislarimizni xursand qilmoqchimiz.
Ertangi o‘yinga muxlislarning kelishini istayman. Biz ham 8 ming muxlisning qarshisida to‘p tepishni istaymiz. Bu esa bizga qo‘shimcha kuch beradi.
