Toshkentning “Bunyodkor” jamoasi BAA yig‘ini doirasidagi so‘nggi nazorat uchrashuvini o‘tkazdi.

Bu safar Mirjalol Qosimov shogirdlariga qarshi Dubayning “Shabab Al-Al-Ahli” klubi vakillari saf tortishdi.

Qiziqarli kechgan bahsda “Bunyodkor” raqibdan har jabhada ustun ekanligini isbotlab, 4:1 hisobida g‘alaba qozondi. Uchrashuvning 26-daqiqasida Sanjar Qodirqulov tomonidan oshirilgan to‘pni Filip Rayevas boshi bilan raqib darvozasiga to‘g‘rilab, hisobni ochdi. Tanaffusga chiqish arafasida mezbonlar gol urishib, o‘rtadagi muvozanatni tiklagandilar. Biroq uchrashuvning so‘nggi o‘n daqiqasida “Shabab Al-Ahli” darvozasi yana uch bor ishg‘ol etildi. 82-daqiqada Mirjahon Mirahmadov maydon markazida to‘pni egallab olib, raqib futbolchilarini ortda qoldirgan holda dubayliklar darvozasini ishg‘ol qildi. 88-daqiqada jamoaviy uyushtirilgan chiroyli kombinasiyani Rasul Yuldoshev gol bilan yakunladi – 1:3. Asosiy vaqt yakunlanayotgan pallada Rasul Yuldoshev raqib futbolchilari va posbonini birin-ketin aldab o‘tib, yakuniy natija “Bunyodkor” foydasiga 4:1 bo‘lishini ta’minladi.

Shu tariqa, “Bunyodkor” BAA yig‘ini doirasidagi to‘rtinchi nazorat uchrashuvida ham g‘alaba qozondi. Bungacha Mirjalol Qosimov shogirdlari bilan BAAning “Sharja” va Xitoyning “Shandun Lunen” klublarini 3:1 va 4:0 hisoblarida mag‘lub etgan va chin yurtining boshqa vakili “Chunsin Lifan” jamoasi bilan 0:0 hisobida durang o‘ynagandi.

Nazorat uchrashuvi
Dubay. "Al-Maktum" stadioni
“SHABAB AL-AHLI” – “BUNYODKOR” 1:4 (1:1)
Gollar: Filip Rayevas 26 (0:1), 44-daqiqa (1:1), Mirjahon Mirahmadov 82 (1:2), Rasul Yuldoshev 88 (1:3), Rasul Yuldoshev 90 (1:4)
“Bunyodkor”: Murodjon Zuhurov, Islomjon Qobilov, Rustamjon Ashurmatov, Mirg‘iyos Sulaymonov, Xurshid G‘iyosov, Jovlon Ibrohimov, Murodjon Toshmatov, Mirjamol Qosimov, Sanjar Qodirqulov, Shoxruh Gadoyev, Filip Rayevas
Zaxiradan maydonga tushganlar:  Suhrobjon Sultonov, Anvar G‘ofurov, Sardor Sobirxo‘jayev, Davronbek Umirov, Rasul Yuldoshev, Artyom Gabelok, Mirjahon Mirahmadov, Abdulla Abdullayev