Toshkentning “Bunyodkor” jamoasi 8-20 fevral kunlari BAAda yig‘in tashkil etdi.
Dubayning “Jebel Ali” majmuasida o‘tkazilgan mashg‘ulotlar jarayonida jismoniy holatni ko‘tarish bilan birgalikda, texnik va taktik tayyorgarlikka ham alohida urg‘u berildi. Shuningdek, Xitoy va BAA klublari bilan jami to‘rtta nazorat uchrashuvi o‘tkazildi. Birgina “Chunsin Lifan” klubi bilan bahsda durang qayd etildi. Qolgan uchta o‘yinda – “Shandun Lunen” (4:0), “Sharja” (3:1) va “Shabab Al-Ahli” (4:1) jamoalari mag‘lubiyatga uchratildi.
Mirjalol Qosimov shogirdlari BAAda olib borilgan 13 kunlik mashg‘ulotlarni yakunlashib, bugun Toshkentga qaytib kelishdi. “Qaldirg‘ochlar”ga ikki kunlik qisqa ta’til berildi. Mavsum startiga qaratilgan tayyorgarlikning so‘nggi bosqichi klub qarorgohida 24 fevraldan yana davom ettiriladi.
