Italiya chempionatining 26-turi doirasida markaziy o‘yin Rimdagi "Olimpiko" stadionida bo‘lib o‘tdi. Mezbonlar — "Roma" klubi o‘z maydonida "Milan"ni qabul qilib, imkoniyatni boy berib qo‘ydi.

O‘yin davomida rimliklar tashabbusni o‘z qo‘llarida ushlab turishdi. Tanaffusga qadar "rossoneri" ishonchli himoyalandi va raqibga xavfli vaziyat yaratish imkonini bermadi.

Ikkinchi taymning ilk daqiqalari mehmonlar uchun omadli keldi. Milanliklar Kutronening goli evaziga hisobda oldinga o‘tib olishdi. Shundan so‘ng ham Gattuzo shogirdlari himoyalanishda davom etishdi va qarshi hujumdan foydalanish payida bo‘lishdi. Ularning bu taktikasi yana bir marta o‘z samarasini berdi. Bahsning 74-daqiqasida Kalabriya "Roma" darvozasini ishg‘ol qildi.

Ushbu mag‘lubiyatdan keyin "Roma" 50 ochko bilan 5-o‘ringa tushib qolgan bo‘lsa, "Milan" "Sampdoriya" bilan birga 6 va 7-o‘rinlarni bo‘lishib turibdi. Gattuzo jamoasining "A" seriyadagi mag‘lubiyatsiz o‘yinlar seriyasi 8ta uchrashuvga yetdi.

Italiya A seriyasi, 26-tur
Roma – Milan 0:2 (0:0, 0:2)
Gollar: 0:1 – 48 Kutrone, 0:2 – 74 Kalabriya.
Roma – Alisson, Bruno Peres, Manolas, Fasio, Kolarov, Pellegrini (Jerson, 80), Strotman, Nainggolan (Djeko, 64), Under (Defrel, 73), Shik, Perotti.
Milan – Donnarumma, Kalabriya, Bonuchchi, Romanyoli, Rodriges, Kessie, Bigliya, Bonaventura (Montolivo, 90), Suso (Borini, 82), Kutrone (Kalinich, 67), Chalxanoglu.