Bugun Milliy olimpiya qo‘mitasi prezidenti va O‘zbekiston futbol Assosiasiyasi 1-vise-prezidenti Umid Ahmadjonov Slovakiyaning yurtimizdagi elchisi Yan Bori bilan uchrashdi.

Uchrashuv davomida O‘zbekiston hamda Slovakiya futbol Assosiasiyalari o‘rtasida hamkorlik aloqalarini o‘rnatish, o‘zaro tajriba almashish, bolalar futboli bo‘yicha mutaxassislarni jalb qilgan holda bu yo‘nalishdagi chora-tadbirlarni rivojlantirish masalalari muhokama qilindi.

O‘z o‘rnida janob Yan Bori yurtimizda futbolni yuqori bosqichga olib chiqish borasida hukumat darajasida amalga oshirilayotgan islohotlarni yuqori baholab, Slovakiya bu borada O‘zbekiston bilan hamkorlikda ishlashga hamisha tayyor ekanini ham alohida ta’kidlab o‘tdi.

Uchrashuv davomida Slovakiyada joylashgan Bratislava futbol akademiyasi bilan O‘zbekistondagi futbol maktablari o‘rtasida yaqin aloqalarni o‘rnatish, bolalar futbol mutaxassislarini yurtimizga jalb qilish va ularning tajribasidan unumli foydalanish bo‘yicha ham kelishuvga erishildi.