O‘zbekiston U23 terma jamoasi Osiyo chempionatida muvafaqqiyatga erishgach, Prezidentimiz tomonidan "Malibu" avtomobili sovg‘a qilindi.
Ushbu g‘oliblik ularni xalq orasida yana ham mashhurroq qilgani bor gap. Ayniqsa, "Prezident sovg‘asi" deb yozilgan oq rangli "Malibu"ni ko‘rgan odam borki, uning boshqaruvida yo Osiyo chempioni yoki uning yaqin insoni ekanligini yaxshi tushunadi.
Xullas, bugun "Prezident sovg‘asi"ni minib yurgan azamatlar xalqning nazarida, ularga ko‘cha-ko‘yda havas bilan boquvchilar, ularni kuzatuvchilar talaygina.
Bugun ijtimoiy tarmoqlarda ana o‘sha "Prezident sovg‘asi"dan birining oldida turgan Osiyo chempioni Rustam Ashurmatov hamda Yo‘l patrul xizmati xodimi surati juda tezlikda tarqaldi.
Har qaysi sayt, har bir foydalanuvchi ushbu suratga o‘zicha izoh berdi, uni o‘zicha talqin qildi.
Kimdir Rustam Ashurmatovni yulduzlik kasaliga chalingani haqida izoh qoldirgan bo‘lsa, yana kimdur "Osiyo chempioni bo‘ldik deb, ko‘ngilga kelganini qilish kerakmas, oqibati shunday bo‘ladi" deya o‘zicha voqeni taxmin qilib ko‘rdi.
Izoh qoldirganlar borki, ko‘pchiligi Rustam Ashurmatovni yo‘l harakati qoidasini buzgan deb hisoblab fikr bildirdi.
Biz ushbu masalaga oydinlik kiritish maqsadida Rustam Ashurmatovning o‘zi bilan bog‘lanib, voqea qanday bo‘lgani va uni YPX xojimi nima sababdan to‘xtatganiga qiziqdik.
- Rustam, bugun ijtimoiy tarmoqlarda tarqalgan rasmga izoh bera olasizmi? Nima bo‘lgan edi?
- Assalomu aleykum. Aslida ijtimoiy tarmoqlardagi fikr bilidrilganchalik hech qanday ish bo‘lgani yo‘q. Ertalab mashg‘ulotlarga ketayotgan vaqtimda yo‘l patrul xizmati xodimi to‘xtatdi. Yo‘l chetida to‘xtadim va hujjatlarimni taqdim etdim.
YPX xodimi hujjatlarimni tekshirdi va qachon davlat raqami taqishimni so‘radi. Men 2-3 kunda davlat raqami olishimni aytdim va hujjatlarimni qaytarib berdi. Boshqa hech qanday gap yo‘q.
- Siz qoida buzmagandingizmi? Faqat hujjatlarni tekshirish uchun to‘xtatdimi?
- Xuddi shunday. Qoida buzganim yo‘q, ular to‘xtatib hujjatlarim joyida ekanligini tekshirishdi, xolos.
- Ijtimoiy tarmoqlarda fikr bildirgan muxlislarga nima deysiz?
- Nima deyishim mumkin, biz ham hamma qatori insonmiz. Eng avvalo qoidalarga bo‘ysunishimiz shart va qonun oldida chempionmi yoki oddiy insonmi hamma barobar.
Shuni tushungan holda yo‘lda yurganda qoidalarga bo‘ysunamiz, qoidalarni buzadigan bo‘lsak xuddi futboldagi kabi qoida buzganimiz uchun jazolanishimizni boshqalardan ko‘ra yaxshiroq anglaymiz. Har xil gap so‘zlarga ishonmasligingizni so‘rab qolaman.
- Yangi mavsumda sizga va jamoangizga omad tilaymiz.
- Rahmat.
