Qirg‘iziston poytaxti Bishkek shahrida sport kurashlari bo‘yicha Osiyo chempionati boshlandi.

Yunon-rum kurashi bo‘yicha bahslarda ishtirok etayotgan ikki nafar sportchimiz raqiblarini mag‘lubiyatga uchratib, final yo‘llanmasini qo‘lga kiritdi.

Bungacha -59 kg vazn toifasida janglarda qatnashgan Yelmurat Tasmurodov ushbu qit’a birinchiligida -63kg vazn toifasida janglar o‘tkazmoqda.

Riodagi Olimpiya o‘yinlari sovrindori musobaqadagi ilk jangida hindistonlik raqibini 8:0 hisobida mag‘lubiyatga uchratdi. Yarim finalda esa jahon chempionati kumush medali sohibi hisoblangan qozog‘istonlik Meyrambek Aynagulovni 13:8 hisobida mag‘lubiyatga uchratdi. Shuni alohida qayd etib o‘tish lozimki, jang yakunlanishiga 1,5 daqiqa qolganida  sportchimiz 1:8 hisobida imkoniyatni boy berayotgandi. Muhim pallada u vaziyatni o‘z tomoniga og‘dira oldi va final yo‘llanmasini qo‘lga kiritdi.

Uning finaldagi raqibi birozdan so‘ng ma’lum bo‘ladi.

-130kg vazn toifasida janglarda ishtirok etayotgan Mo‘minjon Abdullayev esa dastlabki jangida mezbonlar vakili Ramonovdan 7:1 hisobida ustun keldi. Yarim finalda esa qozog‘istonlik Savenkoni 8:0 hisobida mag‘lubiyatga uchratdi. Endi u oltin medal uchun eronlik Mehdizodaga qarshi gilamga chiqadi.

Final bellashuvlari ham bugun o‘tkaziladi.