Xabaringiz bor, bugun Superliganing yangi mavsumi boshlanadi. 1-turning ikkita o‘yini “Qizilqum” – “Lokomotiv” va “Neftchi” – “Nasaf” uchrashuvlari bugun bo‘lib o‘tadi.

O‘zbekiston Milliy Olimpiya qo‘mitasi prezidenti va O‘zbekiston futbol Assosiasiyasi 1-vise-prezidenti Umid Ahmadjonov  Superliganing ochilish uchrashuvlaridan biri bo‘lgan “Neftchi” – “Nasaf” uchrashuvini Farg‘ona shahridagi “Istiqlol” stadionidan bevosita kuzatib boradi.

Umid Ahmadjonov Farg‘onaga tashrifi davomida viloyatda sport sohasida amalga oshirilayotgan chora-tadbirlar, Olimpiya sport turlarini rivojlantirish borasida sa’y-harakatlar bilan yaqindan tanishadi.

Shuningdek, bugungi kundan o‘rin olgan ikkinchi uchrashuv “Qizilqum” – “Lokomotiv” o‘yinini bevosita stadiondan tomosha qilish uchun Jismoniy tarbiya va sport vaziri Shoakrom Isroilov Navoiyga jo‘nab ketdi.

Hududlarda futbolni rivojlantirish va ommalashtirish, futbol klublarining professionalligini oshirish va futbol infratuzilmasini yaxshilashda  viloyat rahbarlarining hissasi juda katta. Shuni inobatga olgan holda, endilikda viloyatlarda bo‘lib o‘tadigan har bir futbol uchrashuvlarida viloyat futbol federasiyasi prezidenti hisoblangan viloyat hokimi shaxsan qatnashib boradi.

Eslatib o‘tamiz, “Qizilqum” – “Lokomotiv” soat 18:00da, “Neftchi” – “Nasaf” uchrashuvi esa soat 20:00da boshlanadi.